Ken ta

Irene Monte-van Grieken a nanse na Kòrsou, 14 novèmber 1945. E ta kasá i tin 1 yu hòmber.

Irene su bida artístiko a kuminsá for di añanan 60 piko.
El a sigui su karera artístiko pa mas ku 40 aña den diferente obra di diferente outor manera, entre otro:
Eddy Pietersz Heyligers
+ Guillermo Rosario  
+ Stanley Bonifacio
Eligio Melfor i hopi otro mas.

Irene a aktua den masha hopi komedia mes, te ku e la stòp di konta nan pero ta ku e komedianan di "Beberin" den aña 70 Irene a traha su nòmber te ku awe. Tambe el a aktua den diferente pelíkula di Norman de Palm, Felix de Rooy i John Leerdam
 
Na final di '2007 Conference About Women and Power' e di kuater konferensha anual di hende muhé na Kòrsou na mart 2007, tabatin e selebrashon anual di hende muhé i ta ei Irene a estrená su promé One-Woman-Show "Muhé di Poder", kual obra el a skibi, inspirá pa bida di su mama Cicilia Jansen-van Grieken, kende manera hopi hende muhé tabata un muhé ehemplar, balente i di poder.
Mester bisa ku Muhé di Poder ta un obra ku ta sigui demostrá kuantu mas e artista Irene Monte-van Grieken tin aden.

Irene mes ta spera ku e por sigui ku forsa di Dios pa usa talentonan ku Dios a dun’é, pa grandi i chikí por hari i sigui gosa mas.

Muhé di Poder ta produsí i dirigí pa Reyna Joe, direktor di zonidu ta Jason Rafaël i asistente di produkshon ta Gricelda Mateo Medina.